Երեւանն ունի 125 միկրոավտոբուսային, 46 ավտոբուսային եւ 24 տրոլեյբուսային երթուղի։ Միկրոավտոբուսային ուղեւորափոխադրումն իրականացվում է 70 կազմակերպության կողմից։
Երևանի քաղաքապետարանի տրանսպորտի վարչության տրամադրած տվյալներով՝ երթուղային տաքսիները (2300-2350 մեքենա) կազմում են մայրաքաղաքի հասարակական տրանսպորտի 85 տոկոսը, ավտոբուսները՝ ընդամենը 5, տրոլեյբուսները՝ 2, իսկ մետրոն՝ 8 տոկոս:
Նախատեսվում է մայրաքաղաքում տեղադրել շուրջ 400 ավտոկայանման սարքավորում, որոնցից յուրաքանչյուրը կսպասարկի 24 կայանատեղի: Մայրաքաղաքում ընդհանուր առմամբ կգործի շուրջ 9600 ավտոկայանատեղ:
Վերջին վեց ամսվա ընթացքում մոտ 35 ավտոբուս է ներկրվել Հայաստան, որոնք այժմ շահագործվում են։ Մինչեւ տարեվերջ սպասվում է եւս 80 ավտոբուսի ներկրում:
Արդեն այս տարի Երևանը կհամալրվի նորակառույց երեք անցումներով։ Դրանց շինարարական աշխատանքներն ընթացքի մեջ են:
Հասարակական տրանսպորտի 5 ավտոբուսներում ներդրվել է Wi-Fi ինտերնետ:
«Անվտանգ քաղաք» հայեցակարգի շրջանակում Երևանի 60 բանուկ խաչմերուկներում ավարտվել է տեսախցիկների տեղադրման գործընթացը: Բնակչության անվտանգությունն ապահովելու նպատակով տեսախցիկներ են տեղադրվում նաև Երևանի մետրոպոլիտենում:
Սակայն կատարվող աշխատանքները բավարար չեն: Մայրաքաղաքի տրանսպորտային խնդիրների լուծման նպատակով ակտիվ պայքար է սկսվել Facebook սոցիալական ցանցում: «Արժանապատիվ տրանսպորտ», «Մենք չենք կռանում երթուղայինում», «Դեմ ենք մետրոյի թանկացմանը» խմբերը կազմակերպում են տարբեր բողոքի ակցիաներ և քննարկումներ: